АКШ президенти Дональд Трамп ага каршы Вашингтондогу «Аялдар жүрүшү» менен бирге көчөлөргө чыккан дүйнөдөгү жүз миңдеген адамдардын «укуктарын тааный турганын» билдирди.

"Тынчтык акциялары биздин демократиянын айырмаланып турган белгиси болуп эсептелет. Мен алар менен макул болбосом да, адамдардын өз көз караштарын айтууга болгон укуктарын тааныйм" – деп жазды Трамп 22-январда Твиттер баракчасына.

Бул Трамп АКШнын 45-президенти катары ант бергенден кийин Вашингтондо, Кошмо штаттардын жана дүйнөнүн башка шаарларында өткөн жүрүштөр тууралуу анын администрациясынын алгачкы билдирүүсү болду.

Түрдүү маалыматтар боюнча, аялдардын Вашингтондогу митингине Трамптын ант берүү аземине караганда көп адам чогулган.

Трамптыкына караганда Барак Обаманын биринчи инаугурациясына көбүрөөк адам катышканы тууралуу маалымат каражаттарынын билдирүүлөрүн Акүйдүн басма сөз катчысы Шон Спайсер кескин сынга алды. Ал ММКларды чогулган адамдардын саны боюнча жалган маалымат берүүгө айыптады.