АКШнын Тель-Авивдеги элчилигин Иерусалимге которуу боюнча сүйлөшүүлөр башталды. Акүйдөн кабарлашкандай, 22-январда Трамп Израилдин премьер-министри Биньямин Нетаньяху менен телефон аркылуу сүйлөштү.

Израилдин премьер-министри Трамптын чакыруусун кабыл алып, февралда Вашингтонго келе турганын билдирди. Нетаньяху телефон аркылуу сүйлөшүү “өтө жылуу” маандайда өткөнүн баса белгиледи.

Дональд Трамп шайлоо кампаниясы маалында АКШ элчилигин Тель-Авивден Иерусалимге которуу ниетин билдирген. Батыш басылмалары мындай кадам палестиналыктардын жана региондогу араб өлкөлөрүнүн кыжырдануусун жаратарын билдиришүүдө.

Иерусалим мэри Нир Баркат элчиликти жылдыруу боюнча Трамптын администрациясынын ниетин колдой турганын жарыялады. Иерусалимдин вице-мэри Меир Тургеман израиль радиосуна берген маегинде, мурдагы президент Барак Обаманын Чыгыш Иерусалимде жөөт кыштактарын чоңоюшуна каршы пикирине байланыштуу бул маселе мурда каралбаганын айтты.