2014-жылдан бери уланып жаткан Йемендеги куралдуу жаңжал ири ачкачылыкка алып келиши мүмкүн. Бул тууралуу БУУнун чукул жардам берүү боюнча координатору Стивен О`Брайен билдирди.

ВВС телеканалы билдиргендей, БУУ өкүлү Йемендин 10 миллионго чукул жашоочусуна, анын ичинде эки миллиондой кичинекей балага азык-түлүк жетишпей турганын белгиледи. О`Брайендин айтымында, өлкөдөгү гуманитардык абал токтобой жаткан бомбалоолордон улам начарлап жатат.

Йеменде куралдуу кагылыштар 2014-жылдын сентябрында башталган. Шийит азчылыгы эсептелген хуситтер Ирандын колдоосу менен өлкөнүн эл аралык коомчулук тарабынан таанылган өкмөтүнө каршы күрөш жүргүзүүдө. Өз кезегинде йемендик өкмөттү Сауд Арабиясы башында турган эл аралык коалиция колдоодо.

Хуситтер менен коалиция аскерлеринин ортосундагы кагылышуулар 2015-жылдын мартында, союздаштардын авиациясы көтөрүлүшчүлөрдү бутага алып баштаганда күчөп кеткен. Жалпысынан 2014-жылдан бери Йемендеги куралдуу кагылыштардан он миңге жакын киши курман болгон.