Израиль парламенти Иордан дарыясынын батыш жээгиндеги палестиндерге таандык жерлерге уруксатсыз түрдө курулган төрт миңдей турак жайды мыйзамдаштырды. Мыйзам долбоору дүйшөмбү күнү кечинде 60 добуш менен кабыл алынды, каршы болгондор – 52.

Документке ылайык, жерге башынан ээлик кылган палестиналыктар компенсация иретинде акча же башка жер тилкесин алышат. Палестина автономиясынын бийлиги палестиналыктарга Израилге жер сатууга тыюу салат, талапты аткарбагандарды өлүм жазасына тартуу каралган.

Буга чейин мыйзам долбоору Израилдин өзүндө жана дүйнөдө сынга кабылган. Документтин укуктуулугу эми сотто териштирилиши мүмкүн.

Би-Би-Си маалымдагандай, Израилдин башкы прокурору Авихай Мандельбит анын Конституцияга каршы келерин билдирди.

Палестиналыктар мыйзамды айыптап, бул аймакты баш-аламандыкка жана туруксуздукка кириптер кыларын айтышууда.