АКШ, Жапония, жана Түштүк Корея мамлекеттери Түндүк Корея баллистикалык ракетасын сынагандыгы үчүн БУУну Коопсуздук Кеңештин чукул жыйынын өткөрүүгө чакырышты. Вашингтон, Токио жана Сеулдун өкүлдөрү Пхеньяндын бул аракети уюмдун резолюциясына каршы келерин билдиришүүдө.

БУУнун Коопсуздук Кеңешинин жыйыны бүгүн кечинде өтүшү ыктымал.

Жекшемби күнү эртең менен Пхеньян орто аралыктагы жаңы баллистикалык ракетасын учурганын кабарлады. Түндүк Корея ракета ядролук жардыруучу бөрктү ташып жүрүүгө кудуреттүү экенин баса белгиледи.

Сеул, Токио жана Вашингтон ракетанын коё берилишине көз салып турду. Адистердин пикиринде, бул орто аралыктагы “Мусудан” баллистикалык ракетасынын өркүндөтүлгөн түрү, бирок континенттер аралык ракета эмес.

Дональд Трапм АКШ президенти болгондон бери Түндүк Корея алгач ирет бул сыяктуу сыноосун өткөрдү. Кошмо Штаттардын ММКлары муну жаңы администрацияга карата чакырык катары баалашты. Вашингтон Пхеньян менен болгон мамилесин толугу менен кайра карап чыгарын билдирди. Алардын ичинде каржы санкцияларын катаалдаштыруу, аймактагы америкалык деңиз аскерлеринин санын көбөйтүү пландары да камтылууда.