Бириккен Улуттар Уюмунун Коопсуздук Кеңеши эгер Түндүк Корея ракеталык жана өзөктүк куралдарын сыноону токтотпосо, анда «олуттуу жаңы чаралар» көрүлө турганын эскертти.

Коопсуздук Кеңешинин мындай билдирүүсүнө Түндүк Кореянын өткөн жылдын 19-октябрындагы жана быйыл февралдагы баллистикалык ракеталарын сыноосу себеп болду.

Билдирүүдө өзөктүк куралдарды жеткирүү каражаттарын түзүү иштери БУУнун резолюцияларына каршы келери жана чыңалууну күчөтө турганы айтылат. Ошондой эле БУУга мүчө бардык өлкөлөрдү Коопсуздук Кеңеши тарабынан 2006-жылы кабыл алынган түндүк кореялык санциялар боюнча алты резолюцияны аткарууга чакырат.

Буга чейин Пхеньяндын бул аракеттерин БУУнун баш катчысы Антониу Гутерреш менен АКШ президенти Дональд Трамп да кескин сынга алган.

CNN телеканалы Пентагондогу булактарына шилтеме кылып, акыркы ракеталык сыноолор Түндүк Корея акырындык менен өзүнүн баллистикалык ракеталарын өркүндөтүп жаткандыгынан кабар берээрин билдирүүдө. 11-февралда сыналган орто алыстыктагы ракетасы суу алдындагы кемелер үчүн чыгарылган ушундай эле ракетадан бир канча чоң радиуска ээ болгон.

Өткөн жылы Түндүк Корея 2 өзөктүк жардырууну ишке ашырып, 20 жолу ракеталарды учурган. Акыркы сыноодо ракета Жапон деңизинен 500 чакырым алыстыкта кулаган.