Сириядагы абалды жөнгө салуу боюнча Астанада өтө турган жыйын 16-февралга жылды. Бул тууралуу Казакстандын ТИМи билдирди. Буга чейин жаңжалды жайгаруу боюнча сүйлөшүүлөрдүн жаңы айлампасы 15-февралда баштала турганы кабарланган.

«Интерфакс» маалымат агенттиги араб ММКларына шилтеме берип кабарлагандай, сириялык оппозиция белгиленген убакытка келбегендиктен жыйын жылдырылган болушу мүмкүн.

Астанадагы сүйлөшүүлөргө расмий түрдө Сирия өкмөтүнүн, куралдуу оппозициянын өкүлдөрү, БУУнун атайын чабарманы Стаффан де Мистура жана америкалык байкоочулар чакырылган. Ок атышуу режимин сактоо жана Сириянын айрым райондорундагы абалды жөнгө салуу чараларын көрүү – күн тартибиндеги негизги темалар.

Сүйлөшүүлөргө президент Башар Асаддын режимин колдогон Орусия жана козголоңчуларга жардам берген Түркия ортомчулук кылууда.

БУУнун эсеби боюнча алты жылга созулган куралдуу жаңжал учурунда Сирияда 300 миңден ашуун киши курман болду.