АКШ Конгрессинин жетекчилери президент Дональд Трамптын жардамчыларынын  Орусия менен болгон байланыштарын иликтөөгө ниеттенишүүдө.

Негизинен алардын Дональд Трамп кызматка киришерден мурунку ымалаларына басым жасалат.

Сенаттагы көпчүлүктүн лидери Митч Макконнелл 14-февралда Сенаттын чалгындоо боюнча комитети 13-февралда отставкага кеткен Майкл Флинн менен аңгемелешерин айтты.

Акүйдүн коопсуздук маселелери боюнча кеңешчиси Трамп кызматка киришерден мурун АКШдагы Орусиянын элчиси менен сүйлөшкөндүгү үчүн кызматтан кеткен.

Акүй Флинндин байланыштары тууралуу Трамп билгенин, бирок ал Орусия элчиси менен болгон сүйлөшүүлөрдүн маңызын ачыкка чыгарбай, адаштырууга аракет жасаганын моюнга алды.

Флинн Орусиянын АКШдагы элчиси Сергей Кисляков менен санкция маселелерин талкуулап, бирок муну Акүйдөн жашырып койгон.

Рейтер агенттиги телефондук сүйлөшүүлөрдүн стенограммасына таянып билдиргендей, Флинн Кисляковго Обама санкцияларга карата курч реакцияда экенин эскерткен. Ал элчиге Трамп бийликке келген соң орус-америка мамилелерин жакшыртуу боюнча кеңири талкууларга өтүү керектигин айткан.

АКШ кезектеги санкциясын жарыялагандан кийин Орусия президенти Владимир Путин адаттан тыш кадам жасап, АКШ дипломаттарын Кремлдеги жаңы жылдык майрамга чакырган.