АКШ президентинин улуттук коопсуздук боюнча жардамчысы Майкл Флинн отставкага кетерден бир жума мурун Украинадагы абалды жөнгө салуу үчүн Орусияга киргизилген санкцияларды алып таштоо боюнча Трампка жакын адамдардан сунуштардын топтомун алган. Бул тууралуу New York Times кабарлоодо.

Басылманын маалыматы боюнча сунуштарды иштеп чыгууга Трамптын жеке адвокаты Майкл Коэн, Орусияда бизнес долбоорлорду издөөгө жардамдашкан президенттин ишкер өнөктөшү Феликс Сатер жана украиналык оппозиционер Андрей Артеменко катышкан. Артеменко Кремль менен ымалада экенин жашырбайт жана Украина президенти Порошенконун коррупциялык иштери тууралуу далилдери бар экенин айтып келет.

Тынчтык планы Украинанын чыгышынан бардык орусиялык күчтөрдү алып чыгып кетүүнү жана Крымды Орусияга 50 же 100 жылга ижарага берүү боюнча Украинада референдум өткөрүү маселелерин ичине камтыйт.

2000-жылдардын башында Артеменко каражатты коромжуга учуратуу боюнча Украинада эки жарым жыл түрмөдө отурган, бирок кийинчерээк айыптоолор алынып салынган.

Феликс Сатер жыйырма жыл мурун мафия аралашкан биржа алдамчылыгына катышканын моюнуна алган. ФБР учурда Майкл Коэндин жана Трамптын башка жакын адамдарынын Орусия өкүлдөрү менен байланыштарын иликтөөдө.