Тажикстандын Хатлон облустук соту 26 жаштагы жергиликтүү тургунду жалданмачылыкка күнөөлүү деп таап, 10 жылга эркинен ажыратты.

Тергөөнүн маалыматы боюнча соттолгон адам Москвада жүргөндө «Ислам мамлекети» террордук тобунун мүчөлөрү менен байланышта болуп, 2016-жылдын аягында мекенине кайтып келгенде кармалган. Соттук териштирүүлөрдүн жүрүшүндө анын күнөөсү толугу менен далилденген.

Материалдарга ылайык, соттолгон жаран социалдык түйүндөрдүн бириндеги баракчасына «Ислам мамлекетинин» идеаларын пропагандалаган 20дан ашык тасманы жайгаштырып, бир нече тажикстандык өспүрүмдү азгырып, террордук топтун катарына тарткан.

Тажикстандын Кылмыш жаза кодексинде жарандарды башка өлкөлөрдөгү согуштук аракеттерге азгыруу үчүн катаал жаза каралган.

Расмий маалыматтар боюнча учурда Хатлондун 210 тургуну «Ислам мамлекетинин» көзөмөлүндөгү аймактарда жүрүшөт, арасында аялдар менен балдар да бар.