АКШда мыйзамсыз жүргөн мигранттарды аныктоо жана депортациялоо боюнча федералдык бийлик менен кызматташуудан баш тарткан шаарлардын саны артууда. The Ohio Jobs & Justice Political Action Committee коомдук уюму билдиргендей, өлкөдө “баш калкалоочу калаалардын” саны беш жүздөй.

Уюмдун маалыматы боюнча Трамптын саясатына жооп иретинде дагы отуз мэр мыйзамсыз жүргөн мигранттарды депортациядан коргоого ниеттенип жатат.

Ошол эле маалда мурда “баш калкалоочу” аталган Аляска, Огайо жана Флоридадагы төрт шаар көз караштарын өзгөрттү.

АКШ президенти Дональд Трамп январда мыйзамсыз жүргөн мигранттарды жашырган шаарларды федералдык бюджеттен каржылоону токтотуу боюнча жарлык чыгарган. Бирок Акүй муниципалитеттердин иммиграция боюнча саясаттарын өзгөртүүдө каражат эмес, жергиликтүү активисттердин басымдары негизги күч болорун моюнга алууда.

Федералдык өкмөт маалымдагандай, “баш калкалоочу шаарлардагы” полиция Иммиграциялык кызмат депортациялоону пландап жаткан эки миңдей мигрантты бошотуп жиберген.