Мурда соттолуп чыккан, майып  Жаслан Сулейменов БУУнун Адам укуктары боюнча комитетинде Казакстанга каршы ишти жеңип чыкты. Комитет  колонияда ага карата адамга жат мамилелер жасалганын жана укугун коргоого мүмкүнчүлүк берилбегенин тааныды.

Астананын 40 жаштагы жашоочусу Жаслан Сулейменов террорчулукка айыпталып жети жыл түрмөдө жаткан. Бирок ал өзүн күнөөсүз деп эсептейт. Түрмөдө майыптарга шарт түзүлбөгөндүктөн ал сегиз жыл бою керебетте жаткан. Сулейменов быйыл февралда эркиндикке чыккан.

Анын укуктарынын бузулушу тууралуу баардык маалыматтар кабыл алынбаганы менен Сулейменов БУУнун чечимине ыраазы экенин билдирди.

Сулейменов комитеттин бүтүмүн алты жыл күткөн. Комитеттин чечиминде Казакстанга бир катар талаптар коюлган. Алардын ичинде кыйноо фактысын иликтөө жана Жаслан Сулейменовго тиешелүү медициналык жардам берүү сунуштары бар.