Иранда бүгүн, 19-майда президенттик шайлоо өтүүдө. Жалпысынан төрт талапкер ат салышууда.

Негизги жарыш азыркы президент Хасан Роухани менен мурдагы башкы прокурор Эбрахим Раисинин ортосунда болору күтүлүп жатат.

Роухани Ирандын өзөктүк программаларын токтотуу аркылуу эл аралык санкциялардан арылууну көздөгөн келишимге кол койгон. Ал жеңишке жетишсе, Батыш менен кызматташууну улантып, жарандардын эркиндигин камсыздоону убада кылууда. 68 жаштагы Роухани шайлоочулар атаандаштарына добуш берсе, туруктуулукка доо кетип, авторитаризм кайра күчөшү мүмкүн экенин эскерткен.

56 жаштагы Раиси Ирандын аятолласы Али Хаменеинин ишенимдүү адамы болуп эсептелет. Ал Иран чет өлкөлүк жардамга муктаж эместигин белгилеп, ислам революциясынын баалуулуктарын кайра жандантарын ишара кылганы бар.

Ирандын 80 миллиондук калкынын 55 миллиону добуш берүүгө укуктуу.