ФБРдин мурдагы жетекчиси Жеймс Коми Орусиянын АКШдагы былтыркы президенттик шайлоого кийлигишүүсү жана президент Дональд Трамптын шайлоо штабындагы адамдардын бул өлкө менен ыктымал байланыштары боюнча иликтөө жүргүзгөндүгү үчүн кызматынан алынганын билдирди.

Жеймс Коми 8-июнда Сенаттын чалгын иштери комитетиндеги коомдук угуу маалында Орусия менен болгон байланышты иликтөө Трамптын кыжырына тийгенин жана бул анын отставкасынын себеби болгонун айтты.

Президенттин жеке адвокаты ФБРдин мурдагы директорунун сөзүн дароо четке какты. Марк Касовиц Комини мамлекет башчысы менен болгон жашыруун маегин ачыкка чыгарууга айыптады.

Сенаттагы көрсөтмөсү алдында кагаз жүзүндө тараткан билдирүүдө Жеймс Коми президент Трамп кызматка киришкен бир аптадан кийин, 27-январдагы кечки тамакта андан ага “лоялдуулук зарылдыгын” жана “лоялдуулукту күтөм”, - деп айтканын белгилеген.

Коми ошондой эле президент Трамптын Улуттук коопсуздук боюнча кеңешчиси Майкл Флин боюнча иликтөөнү жабуу жөнүндөгү өтүнүчүн “көрсөтмө” иретинде кабылдаганын баса белгилеген.

ФБР ал учурда Флиндин Орусия менен ыктымал байланыштарын иликтеп жаткан.

Флин Улуттук коопсуздук боюнча кеңешчилик кызматты бир айдан аз ээлеп, 13-февралда бошотулган