Астанада Сириядагы жаңжалды жөнгө салуу боюнча сүйлөшүүлөрдүн кезектеги айлампасы башталды. Катышуучулар “деэскалация зоналарын” талкуулашары күтүлүүдө. Сириядагы жарандык согушту жайгаруу боюнча мурдагы төрт жолугушуу январдан майга чейин болгон.

Казакстандын Тышкы иштер министрлигинин маалыматы боюнча, жолугушуунун катышуучулары гуманитардык жардам менен камсыздоо жана инфраструктура объектилерин калыбына келтирүү маселелерин талкуулашат. ЮНЕСКОнун маданий мурастар тизмесине кирген Сириядагы тарыхый эстеликтерди минадан зыянсыздандыруу боюнча билдирүү иштеп чыгуу пландалууда.

Тараптар бүгүн алдын ала кеңеш өткөрүшөт, пленардык жыйын 5-июлда өтөт. Бул жолугушууда кепил өлкөлөр камактагы кишилерди бошотуу боюнча жумушчу комитеттин жоболорун кабыл алышат. Мындан тышкары “Улуттук элдешүүнүн сирия комитетин” түзүү маселеси дагы каралышы ыктымал.

Астанадагы жолугушууга сирия оппозициясынын тогуз өкүлү келди.