Ирандын президенти Хасан Роухани эгер Кошмо Штаттар санкциялар боюнча мыйзам долбоорун кабыл алса, Тегеран жооп кайтарарын билдирди.

Аталган мыйзам долбооруна ылайык, Ирандын баллистикалык ракета боюнча программаларына катыштыгы бар адамдарга жана алар менен кызматташкандарга санкциялар киргизилет. Ошондой эле "Револиция сакчылары" корпусу террористик уюм деп табылат.

Кошмо Штаттардын Өкүлдөр палатасы мыйзам долбоорун 25-июлда жактырды, эми ал Сенатка добуш берүүгө жөнөтүлөт.

Иран расмийлеринин айтымында, бул мыйзам долбоору 2015-жылы Тегеран менен дүйнөлүк алты державанын ортосунда келишилген макулдашууга карама-каршы келет. Ага ылайык, Иран өзөктүк программасын чектөөгө макул болгон. Ага жооп катары Тегеранга киргизилген эл аралык экономикалык санкциялар жоюлган.

Мыйзам долбоорунда Орусия жана Түндүк Кореяга каршы да жаңы санкциялар каралган.