Испан полициясы Каталонияда теракттарды жасоого шектелген төрт жаранды Мадриддеги сотко алып келди. Соттун имаратынын алдында коопсуздук чаралары күчөтүлдү. Бул тууралуу Reuters кабарлоодо.

Полициянын маалыматы боюнча Каталониядагы теракттарга 12 кишиден турган уюшкан топтун тиешеси бар. Учурда алардын баары кармалганы же өлтүрүлгөнү тастыкталууда.

Күн мурун полициячылар Барселона борборунда карапайым адамдарды тепселеп кеткен жүк ташуучу унаанын айдоочусу болушу мүмкүн делген Юнес Абуйаакубду атып өлтүрүштү.

17-августта Каталонияда болгон кол салуудан 15 киши курман болгон, 100дөн ашууну жаракат алган. Терактты “Ислам мамлекети” террордук тобу жасаганын жарыялаган.