Коронавирустун кесепетинен көз жумган адамдын сөөгүн чыгаруу учуру. Ооганстан. 7-июнь, 2020-жыл. Иллюстрациялык сүрөт.

Саламаттык сактоо министринин орун басары Нурболот Үсөнбаевдин брифингде билдиргенине караганда, 17-июнга караган түнү Жалал-Абад облусунда дарыланып жаткан 36 жаштагы жигит коронавирус жугузуп алгандан кийин каза тапты. Ал Жалал-Абадга тажыяга катышуу үчүн 11-июнда Бишкектен барганы белгилүү болду.

“Ал жактан абалы начарлап, Жалал-Абад шаардык ооруканасына кайрылган. Ал жерде стационарда жаткан, жандандыруу бөлүмүндө да дарылоо аракеттеринен натыйжа бербей, үзүлүп кетти. Анын эки өпкөсү тең кагынып (пневмония) калганы ренгтенден аныкталды”.

Үсөнбаевдин маалыматы боюнча маркум ооруну Бишкектен жугузуп алган, бирок өз алдынча дарыланып жүрө берген.

Саламаттык сактоо министрлигинин маалыматына караганда, ушуну менен коронавирустун кесепетинен улам 50 жашка жетпей каза болгон экинчи адам катталды. Бир жарым жума мурда Ош шаарында 34 жаштагы келин коронавирус жуккандан кийин каза тапканы расмий кабарланган.

Кыргызстанда 17-июнга карата коронавирус жуктуруп алгандан кийин каза болгондордун саны 30га жетти.

COVD-19га каршы күрөшүү боюнча республикалык штабдын маалыматына караганда, 16-июнда кан рагы менен ооруп жүргөн аял коронавирус жуктуруп алгандан кийин оорусу күчөп, кайтыш болгон. Ал өз оорусунан көз жумганы менен коронавирустун кесепетинен өлгөн деп саналып, COVID-19 илдетинен көз жумгандардын катарына кошулган.

"Азаттык" үналгысы.