Жалал-Абад шаарынын “Курманбек баатыр” дарбазасында Жалал-Абад шаарынан барып, дүйнө чемпиону наамын жана  алтын, коло медалдардын ээси болуп кайткан жаш спортчуларды шаар бийлиги жана коомчулугу салтанаттуу түрдө тосуп алышты.

Жалал-Абад шаарынын социалдык маселелер боюнча вице-мэри Турдалы Темирбаев жана депутаттардын шаардык кеңешинин төрагасы Эрнисбек Ормоков жаш спортчуларды жеңиши менен куттукташты.

 - Биздин спортчуларыбыз чоң сыймыкка ээ болушуп, мамлекетибиздин күчтүүлүгүн, бекемдигин, ынтымагын көргөзүп олтурушат. Балдардын бул ийгиликке жетишине чоң аракеттерди жумшап, күчүнө-күч, демине-дем берген машыктыруучулары болуп эсептелет. Биз бул ийгиликтерди жөн эле көз алдыбыздан өткөрүп жибербестен, буларга сөзсүз моралдык, материалдык жактан колдоолорду көрсөтөбүз. Биздин уучубуз куру эмес. Мындай азаматтардын саны дагы да көбөйөт деген ишеничтебиз. Ал эми жаш спортчуларга ийгиликтерди каалайбыз. Ар дайым Кыргызстандын желегин желбиретип жүрө беришсин, - деди Т.Темирбаев.

Ал эми депутаттардын шаардык кеңешинин төрагасы Эрнисбек Ормоков дүйнө чемпиону Калы Сулаймановго жана алтын, коло медалдын ээлерине шаардык кеңеш сессияда карап чыгып, шаар бюджетинен  акча бөлүп берээрин айтты.