Жалал-Абад шаарындагы Кыргыз-Түрк лицейинде 29-апрель күнү жыл сайын өтүүчү “Жол кыймылынын жаш инспектору” деп аталган район жана шаарлардын арасында облустук финалдык кароо-сынак болуп өттү.

Облустук ички иштер башкармалыгынын басма сөз кызматынын берген маалыматына караганда, аталган кароо-сынакты Жалал-Абад ОИИБнын жол кайгуул күзөт кызматы, билим берүү бөлүмү жана облустук балдар чыгармачылык үйү биргеликте уюштурушту.

“Бүгүнкү кароо-сынакка катышып жаткан окуучулардын ар бири жол эрежесин так билген чыгаан инспекторлордун катарын келечекте толуктайт деген ишеним бар. Менимче, мелдештин негизги максаты татыктуу орун алуу менен бирге, ар бир окуучу жол эрежесин так билип жанындагы жолдошторун кошо үйрөтүп муну менен жол кырсыгына дуушар болгон жаш балдардын санын азайтууга жардам берет деп эсептейм”, - дейт Жалал-Абад ОИИБнын ЖККБнүн башчысы Кылыч Рысбаев. 

Сынак 7 турдан туруп, шаар-райондордун орто мектептеринен 8 команда келишип, конкурстун жоболорун мыкты аткаруу менен калыстардын койгон бааларынын негизинде жеңүүчүлөр аныкталды. Биринчи орунду Майлуу-Суу “Веселые регулировщики” командасы, экинчи орунду Жалал-Абад шаарынын “По пути” командасы, ал эми үчүнчү орунду Сузак районунун “Жашыл чырак” командасы жана Аксы районунун “ЮДГ” командалары ээлешип баалуу белектер жана сый баракчалар менен сыйланышты.