Валентина Шевченко.

​Таймаштын аралаш түрү боюнча UFC'нин чемпиону болгон кыргызстандык Валентина Шевченко бүгүн, 7-апрелде Бишкекке учуп келди.

Спортчуну "Манас" эл аралык аэропортунан вице-премьер-министр Алтынай Өмүрбекова, президенттик аппараттын жетекчисинин орун басары Алмаз Кененбаев, Жаштар иштери жана дене тарбия агенттигинин жетекчи орун басары Канат Арпачиев тосуп алды. Мындан сырткары аба майданына Шевченконун жакындары, күйөрмандары чогулушту.

Буга чейин Валентина Шевченко "Инстаграмдагы" баракчасы аркылуу Бишкектеги жана Оштогу күйөрмандары менен жолугарын кабарлаган. Салтанаттуу жолугушуу эртең, 8-апрелде "Бишкек парк" соода борборунда өтөт.

Кыргызстанда төрөлүп өскөн Валентина Шевченко 2018-жылдын 9-декабрында таймаштын аралаш түрлөрү боюнча UFC мелдешинде жеңишке жетип, чемпион болгон.

UFC уюмунун эң жеңил салмактагы (flyweight. 57 кг.) чемпиондук титулу үчүн беттеш Канадада өтүп, Шевченко польшалык Йоанна Ежейчик менен беттешкен. Мелдештин жүрүшүндө беш раундда Шевченко үстөмдүгүн көрсөтүп, жеңүүчү аталган.

Шевченко абройлуу саналган UFC уюмунун тарыхында эң жеңил салмакта чемпиондук наамды алган экинчи аял спортчу болуп калды.

"Азаттык" үналгысы