Ноокен районуна караштуу “Ноокен” үрөөнчүлүк кооперативи коңшу Өзбекстандан буудайдын “Аср” жана “Давр” сортундагы үрөөндү алып чыгып, аны себүү аракеттери ишке ашты. Быйылкы жылдын күзүндө 10 гектарга “Аср”, 10 гектар жерге “Давр” буудай үрөөнүн айдап себүүгө жетишип калышты.

Өкмөттүн Жалал-Абад облусундагы ыйгарым укуктуу өкүлү Кыянбек Сатыбалдиев баштаган жергиликтүү бийлик өүлдөрү “Ноокен” үрөөнчүлүк кооперативинин күздүк буудай себүү иши менен жакындан таанышып чыгышты.

Ноокен райондук агрардык өнүктүрүү башкармалыгынын башчысы Турдумамбет Эшиевдин берген маалыматына караганда, Өзбекстандан алып келинген буудайдын “Аср” жана “Давр” жаңы сорту мурда эгилип жүргөн буудайларга караганда, эки эсе көп түшүм берээри күтүлүүдө.

“Коңшу Өзбекстандан алынып келинген буудайдын “Аср” жана Давр” үрөөнүн буга чейин алып чыгууга аракеттенип жүргөнбүз. Мурда эгилип келген буудайлар гектарына 35-40 центнерден түшүм берсе, буудайдын бул жаңы сорту гектарына 100-120 центнерден түшүм берет. Дыйкандар азырынча гектарына 80 центнерден түшүм алабыз деп пландашууда”, - деди Т.Эшиев.

Айдап себүү иштери менен таанышуу учурунда жергиликтүү дыйкандар буга чейин көбүнчө “Краснодар” уругун үрөн катары колдонушуп, ал жердин климаттык шарты менен биздин жердики дал келбей, ойдогудай түшүм бербей жаткандыгын айтышты. Эми бул “Аср” жана “Давр” бизден 10 километр алыстыктагы коңшу Өзбекстандан келип отурат. Алар менен биздин жер кыртышыбыз бирдей экендигин дыйкандар баса белгилешти.

“Өлкө боюнча мындай ири түшүмдүү буудай түрү биринчи жолу Ноокен районунда эгилип жатат. Ал эми быйылкы жылы Ноокен районунда 28 тонна пахта буласы жыйналды. Баасы өткөн жылга салыштырмалуу 5-6 сомго арзан болууда”, - дейт Т.Эшиев.

Анархан Жаңыбаева, kogart.kg