Бүгүн, 7-май күнү Жалал-Абад шаарындагы облустук Барпы театрында Сузак райондук Ооган согушунун ардагерлер кеңеши тарабынан Улуу Жеңиштин 71 жылдыгына карата “Жениш ырлары – окуучулар арасында” аталышындагы райондогу мектеп окуучуларынын арасында кароо-сынак болуп өттү.

Сузак райондук Ооган согушунун ардагерлер кеңешинин төрагасы Толубай Энназаровдун айтымында, бул кароо-сынакты чогултуп өткөрүп берүү жагы райондук балдарга билим берүү борборуна тапшырылган. Кароо-сынакка ар бир аймактан биринчи турда жеңишке жетишкен 11 меткептин окуучулары катышууда.

“Улуу Жеңиштин 71 жылдыгына карата уюштурулуп жаткан кароо-сынакка катышып жаткан ар бир мектеп тапшырмага ылайык, согуш жөнүндө театрлаштырылган көрүнүш көрсөтөт, жеке номер аткарышат, мекен жөнүндө хор ырдашат, Улуу Жеңишке карата мекенчилдик ырларды көркөм окушат. Жеңүүчүлөргө баалуу белектер, дипломдор берилет”, - дейт Сузак райондук балдарга билим берүү борборунун завучу Замирбек Исраилов.